ឃាតកម្មសម្លាប់សិស្សវិទ្យាល័យពងទឹក នៅខណ្ឌពោធិ៍សែនជ័យ ត្រូវកម្លាំងនគរបាលតាមចាប់ជនដៃដល់ និងបក្ខពួកជិត១០នាក់
11-May-2016 | ដោយ មែន កំសត់
ភ្នំពេញ៖ ឃាតកម្មសម្លាប់សិស្សស្រីវិទ្យាល័យពងទឹក នៅរសៀលថ្ងៃនេះ ឥឡូវកម្លាំងនគរបាលខណ្ឌពោធិ៍សែនជ័យ សហការជាមួយកម្លាំងនគរបាលខណ្ឌដង្កោ ក្រោមការបញ្ជាផ្ទាល់ពីនាយឧត្តមសេនីយ៍ ជួន សុវណ្ណ ស្នងការនគបាលរាជធានីភ្នំពេញ បានធ្វើការស្រាវជ្រាវ រហូតតាមចាប់ជនដៃដល់ និងបក្ខពួកមាន ស្រី មានប្រុស ជិត១០ហើយ នាយប់ថ្ងៃទី១០ ខែឧសភា ឆ្នាំ២០១៦នេះ។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យ ដែលដឹកនាំកម្លាំងផ្ទាល់ចុះបង្ក្រាបករណីឃាតកម្មនេះ បានថ្លែងប្រាប់ នៅមុននេះបន្តិចថា «ក្រោយការស្រាវជ្រាវយ៉ាងយកចិត្តទុកដាក់រួចមក កម្លាំងយើងបានឃាត់ខ្លួន ជនដៃដល់៣ទៅ៤នាក់ និងមានបក្ខពួក ស្រី មួយចំនួនទៀត ហើយការឃាត់ខ្លួន ពួកគេធ្វើឡើងនៅខណ្ឌដង្កោ និងនៅសង្កាត់ទឹកថ្លាខណ្ឌសែនសុខ»។
លោកអធិការ បានបន្តទៀតថា ក្រោយការចាប់ខ្លួនយើង ក៏បានដកហូតម៉ូតូរបស់នារីរងគ្រោះផងដែរ ហើយនៅពេលនេះ កំពុងយកទៅសួរនាំ ថាតើនរណាជាប់ពាក់ព័ន្ធខ្លះ នៃអំពើឃាតកម្មនេះ។
លោក យឹម សារ៉ាន់ បានប្រាប់ក្រុមអ្នកកាសែត នៅកន្លែងចាប់ខ្លួនជាជំហានដំបូងថា មូលហេតុដែលនាំឲ្យមានអំពើឃាតកម្មនេះ គឺផ្តើមចេញពីបងប្អូនជីដូនមួយរបស់នារីរងគ្រោះ បានលួងលោមនាំទៅឲ្យបក្ខពួកសម្លាប់ចោលតែម្តង ដែលជនមេគំនិតត្រូវចាប់ខ្លួននៅសង្កាត់ព្រៃវែង ដោយសហការជាកម្លាំងនគរបាលខណ្ឌដង្កោ រួចហើយឈានមកចាប់ខ្លួនបក្ខពួកបន្តទៀត សរុប៧នាក់។
បើតាមមន្ត្រីនគរបាលមូលហេតុ ដែលនាំឲ្យជនដៃដល់សម្លាប់នារីរងគ្រោះ ពីព្រោះតែខឹងសុំខ្ចីលុយ ចំនួន២លើកតែនាងមិនព្រមឲ្យ។
សូមបញ្ជាក់ថា ក្មេងស្រីសិស្សសាលាម្នាក់ ក្រោយពីគេប្រទះឃើញដេកស្លាប់ ដោយស្នាមឈាមយ៉ាងជោគជាំ ស្ថិតនៅដីឡូសំណង់បាក់បែកមួយកន្លែងស្ថិតនៅព្រៃល្វា សង្កាត់ចោមចៅ ខណ្ឌពោធិ៍សែនជ័យ នៅរសៀលថ្ងៃទី១០ ខែឧសភា ឆ្នាំ២០១៦នេះ។
ភ្នាក់ងារ សមត្ថកិច្ចបានរាយការណ៍ថា ក្មេងស្រីរងគ្រោះមានឈ្មោះ វឺន រដ្ឋា អាយុ១៩ឆ្នាំ ជាសិស្សវិទ្យាល័យពងទឹកថ្នាក់ទី១២ដេ៕
ចំនួនអ្នកទស្សនា
- ថ្ងៃនេះ6361
- ម្សិលមិញ20231
- សប្តាហ៍នេះ85441
- ខែនេះ107321
- ឆ្នាំនេះ107321
- សរុប20549777